Интервју на Робин О Нил за МТВ

Крајот на вештачкиот спор за името требаше да се случи одамна

Македонија треба да го заземе своето вистинско место во Европа, но не само поради неа, туку и поради стабилноста и просперитетот на регионот и сите македонски соседи

Македонија во секој поглед покажа дека е дел од Европа и припаѓа на европската култура и демократија, истакна во интервју за МТВ амбасадорот Робин О Нил, поранешен медијатор во грчко-македонскиот спор.
- Земјата е целосно подготвена да биде полноправна членка на ЕУ и на НАТО, и е навистина жално што на Македонија не и беше дозволено да ја игра таа улога комплетно поради нелогични причини, кои освен Грција не ги разбира никој друг, вели во интервјуто О Нил.

Говорејќи за својата прва посета на Скопје една година по независноста, во септември 1992 година, тој се присетува дека тогаш дел од македонските соседи се обидувале да докажат дека новата демократија нема да успее, но Македонија преживеала и го одржала националниот идентитет. О Нил додава дека Македонија е единствена од сите поранешни југословенски републики која независноста ја стекна без насилство и до денес одржува мир во своите граници каде живеат различни етнички заедници и работат како партнери.
- Во една таква атмосфера и во таков дел од Европа, Македонија остана стабилна, работеше на обезбедување добри релации меѓу сите етнички и религиозни групи, на кои им беше овозможено да се чувствуваат како дел од земјата, посочува О Нил.

Тој во интервјуто зборува и за спорот околу името, како и за неговиот колега актуелниот медијатор Метју Нимиц.
- Со интерес ги прочитав последните коментари од Нимиц и се согласувам со него во целост. Има граници во кои медијаторот може да оди. Се што може да направи е да ги олесни контактите меѓу двете страни, и тогаш кога ќе се воспостават директни средби, дијалогот меѓу нив ќе биде подобар. Се надевам овој дијалог ќе продолжи за време на сегашната сесија на Обединетите нации, и билатерално откако сесијата ќе заврши. Крајот на овој вештачки спор требаше да се случи одамна, забележува првиот медијатор во грчко-македонскиот спор.

Во врска со македонското зачленување во НАТО и во ЕУ, О Нил посочува дека Македонија треба да го заземе своето вистинско место во Европа, но не само поради неа, туку и поради стабилноста и просперитетот на регионот и сите македонски соседи. Додава дека на кој начин ќе се реши спорот е прашање на самите граѓани на Македонија, бидејќи тоа ќе зависи од нивните приоритети.
- Секоја промена на името треба да биде придружена со целосна гаранција на другата страна дека веднаш ќе го поддржи влезот на Македонија во сите меѓународни институции, по новото, договорено име. Ништо не може да биде полошо отколку да се прифати ново име, а потоа да се појават низа нови барања и услови пред ново вето за влез на Македонија во ЕУ, НАТО и сите други институции, смета О Нил.

Според него, грешка е што на проблемот со името се гледа само како на прашање што ја засега Македонија и еден од нејзините соседи, зашто крајниот исход има големо значање за сите земји во Европа, но и за ОН.